|
|
|
|
|
|
  
|
Baie welkom terug aan al ons Jan van Riebeeckers! Ons hoop dat u die wintervakansie geniet het en reg is vir ’n opwindende derde kwartaal.
|
Ons is verheug dat me. Elize von Versen na vier maande se kraamverlof weer terug is by JvR - baie welkom en sterkte vir die nuwe kwartaal. Me. Von Versen hervat haar taak as graad 11-graadhoof asook vakhoof van die Handelsvakke. Ons is net so baie bly om me. Sonet Meyer na haar langverlof verlede kwartaal, terug te verwelkom. Die Rekeningkunde-leerders is weer terug in haar knap hande en vir seker opgewonde om haar weer in die klas te hê.
|
Mnr. Wilbur Kastoor gaan steeds tot die einde van die jaar voort as graad 9-graadhoof en me. Ella van Rensburg staan hom vanaf die kwartaal by as assistent-graadhoof. Mnr. Hans-Peter Klink skuif dan vanaf die graad 9's na die graad 8-groep en tree tot aan die einde van die jaar as assistent vir me. Nimmo op. Baie sterkte aan dié kollegas in hierdie belangrike pastorale rol.
|
Ons het ook die wonderlike nuus ontvang dat mnr. Jan Henning en me. Nino van der Merwe die afgelope vakansie verloof geraak het! Ons is saam met hul baie opgewonde en wens hul als wat mooi is toe vir hul huweliksreis wat binnekort afskop!
|
Die matrieks se mondelingmoderering vir Engels (Huistaal en Eerste Addisionele Taal) het reeds die week plaasgevind en ons Jan van Riebeeckers het die vakadviseurs beïndruk met uitstekende mondelinge werk. Baie geluk en dankie aan mnr. Claassen en me. Parker vir hul goeie voorbereiding - beide groepe spog vanjaar met puik graadgemiddeldes vir hul mondelingwerk!
|
|
Baie dankie aan al die ouers wat Woensdag die ouerbesoeke bygewoon het om u kind se akademiese vordering met die onderwysers te bespreek. Indien u nie die betrokke onderwyser tydens dié sessie kon spreek nie, is u altyd welkom om kontak te maak en ’n afspraak te reël - die onderwysers se deure staan oop vir ons ouers/voogde om enige bekommernisse te bespreek.
|
Ek wil u ook aanmoedig om te verseker dat u kind(ers) gebruik maak van die talle intervensieklasse wat ons soggens voor skool aanbied indien hul verdere akademiese hulp benodig.
|
|
Die sport en kultuur teen Hoërskool DF Malan skop vanmiddag af. Baie sterkte aan al ons leerders wat betrokke is - ons sien uit na ’n baie opwindende naweek!
|
Die volledige program is reeds op die JvR-WhatsApp-groep gedeel, maar kliek gerus hier om dit weer af te laai.
|
|
Ons bied weer ’n propvol kwartaalprogram aan al ons Jan van Riebeeckers en ek hoop werklik dat almal ywerig en met groot entoesiasme sal deelneem. Geniet dit!
|
|
***************************************************************************************************AKADEMIE
|
Ons is werklik trots op uitstaande uitslae van die tweede kwartaal! Die Top 20-akademiese presteerders per graad sal Maandag tydens die saalbyeenkoms aangekondig word.
|
|
Winterskool: Graad 12-Rekeningkunde
|
’n Herinnnering aan die graad 12-Rekeningkundeleerders van hul Winterskooldatums: Maandag, 24 Julie en Maandag, 31 Julie vanaf 14:15 tot 16h00 in me. Meyer se klas.
|
|
Fisiese Wetenskappe: intervensietye vir Kwartaal 3
|
|
Let asseblief daarop dat die intervensietye vir graad 10 en 11 verander het.
|
Die graad 11's het vanaf hierdie kwartaal verpligte intervensie vanaf 7:10 op ’n Donderdagoggend.
|
Baie sterkte aan al ons leerders wat volgende week aan verskeie Wetenskapolimpiades deelneem. Die volledige lys van inskrywings volg hieronder.
|
|
Lewenswetenskappe: Dinsdag, 25 Julie 2023 (14:00-17:00)
|
|
Natuurwetenskappe: Woensdag 26, Julie 2023 (14:00-17:00)
|
|
Fisiese Wetenskappe: Donderdag, 27 Julie 2023 (14:00-17:00)
|
|
Sportprogram: Kwartaal 3 en uitslae die afgelope kwartaal
|
Kliek gerus hier om die volledige sportprogram vir Kwartaal 3 af te laai asook die opsomming te sien van al ons uitslae die tweede kwartaal.
|
Die koor repeteer eerskomende Maandagmiddag vanaf 14:15 tot 16:00 - maak asseblief seker almal is teenwoordig. Ons optredes by ons eie Tafelberg Koorfees is om die draai en ons moet begin met nuwe musiek-aanleer met die oog op ons toer aan die einde van die kwartaal.
|
Ons het vanjaar nie minder nie as drie tienertoneelproduksies wat aan verskeie kompetisies gaan deelneem.
|
|
Ons bied vanjaar met trots aan:
|
|
As die donker my roep - deur Darren Cloete (teks en regie)
|
|
Die Dowwe Digtersklub - deur Linda van der Walt (teks en regie)
|
praat gou weer - deur Kanya Viljoen, met regie deur Melissa Myburgh
|
Ons nooi almal uit om ons drie spogproduksies te ondersteun met hul eerste optrede volgende Donderdag, 27 Julie om 18:00 in die skoolsaal. Kaartjies is teen slegs R50 op Quicket beskikbaar: https://qkt.io/dEyq8R. Kaartjies sal ook by die deure beskikbaar wees en heerlike pannekoek word by die snoepie verkoop. Moenie dit misloop nie!
|
|
Ons bied vanaf 1-4 Augustus ons tweede kunstefees aan en alle Jan van Riebeeckers is baie welkom om deel te neem. Kliek gerus hier vir al die inligting en skryf volgende week by die spesifieke kontakonderwysers in:
|
|
Musiek (instrumentaal en sang) - Me. Du Toit
|
|
Toneel en Voordrag - Me. Taljaard
|
|
Kuns en Fotografie - Me. Vrey
|
Spelathon, Talethon, Kreatiewe skryfwerk en Lees - Me. Van Rensburg
|
|
Welgemeend Maand van Kuns
|
|
Ons sien uit na ’n besondere kunsmaand vanaf 2 tot 31 Augustus!
|
|
Vanjaar se tema, Kaapse oomblikke, beloof om besoekers te beïndruk en te bederf met ongelooflike kunswerk en heerlike kuiergeleenthede.
|
Kliek gerus hier om na die algemene advertensie te kyk en hier om die volledige program af te laai. By voorbaat dankie vir almal se ondersteuning!
|
|
Drieankerbaai Gemeente-veiling
|
Ondersteun gerus Drieankerbaai Gemeente se jaarlikse veilingpoging om 18:00 op 8 Augustus. Kliek hier vir al die inligting!
|
Geniet die naweek - ons sien mekaar langs die sportveld by DF Malan!
|
|
|
|
|
|
|
|
|
|
|
