Huis Jordaan, geleë op die skoolterrein, kan nagenoeg 140 leerders akkommodeer en huisves sedert die begin van 2018 al ons seuns- en dogterkoshuisgangers.  Ons koshuis het pragtige, goed toegeruste kamers en al die badkamers is onlangs met moderne afwerkings oorgedoen en mooi gemaak. Leerders kry elke dag drie gesonde maaltye wat deur ‘n goedopgeleide span kombuispersoneel voorberei word. Meeste van ons dienspersoneel is onderwysers by die skool en die leerders het wonderlike verhoudings met almal wat na hulle omsien.

Die seuns, ook bekend as Rog, is op die tweede vloer woonagtig en die meisies, oftewel Sop, woon op die eerste vloer. Die grondvloer word beslaan deur ‘n kombuis, studie- en eetsaal en ‘n kuierarea waar die leerders daagliks gebruik maak van die tafeltennisblad, ‘n pooltafel en ‘n grootskermtelevisie. Daar is ook verskeie bordspeletjies wat sorg vir ernstige pret en kompetisies tydens gangvergaderings of wanneer almal vir ‘n oomblik ontspan.

Benewens al die aktiwiteite wat hulle binne die koshuis kan geniet, is die skool se swembad en tennisbane ook tot die leerders se beskikking. Die skoolterrein verleen hom ook tot ure se skaatsplankryery en sokkerwedstryde op die netbalbane. Daar is ‘n gimnasium op die terrein wat op eie onkoste benut kan word en verskeie koshuisleerders gebruik ook die gimnasium by Lifestyle, wat baie naby aan die skoolgronde geleë is. Leerders wat vroegoggend wil oefen, kan reeds om 5:15 hulle draftekkies aantrek; saans is daar ‘n groep wat by Moltenodam gaan draf en nog ander leerders benut die gratis buite-gimnasium oorkant De Waalpark.

Die koshuisgangers is egter nie nét besig om te oefen nie! Leerders wat gedissiplineerd op hulle eie kan studeer, is welkom om in hulle eie kamers huiswerk te doen en vir eksamens of toetse te leer. Daar is wel ‘n studiesaal wat ingespan word vir leerders wat eerder onder toesig wil werk. Mastermaths is ‘n gewilde skoolhulpmiddel en baie van ons leerders stap in groepe om die klasse by te woon.

Op Woensdae, Vrydae en Saterdae mag die leerders dorp toe gaan om inkopies te doen, iets te gaan eet of sommer net om lekker buite koshuisverband met hulle vriende te kuier. Op Donderdae kan almal wat wil, die NG Kerk se gemeenskapsentrum besoek en gaan luister na interessante praatjies met aktuele temas wat jongmense en tieners raak. Koshuisgangers wat Sondae kerk toe gaan, mag egter die kerk van hulle eie keuse besoek. Leerders wat naweke inbly kry ook gereeld die geleentheid om die natuur, en veral Tafelberg in al sy glorie, te gaan verken. Dis ‘n groot voorreg om in dié omgewing te kan woon, want die stad is ryk aan geleenthede. Dit maak nie saak of jy die teater, kunsuitstallings, sportgebeure, interessante museums en geskiedkundige gedenkwaardigehede verkies nie, hier is iets vir elke koshuisleerders om te geniet.

Die koshuis is ook ryk aan verskeie prettige tradisies soos gereelde gangvergaderings, die befaamde koshuistroue, Rog/Sopdag waar almal ontbyt in die bed eet en ‘n magdom ander lekker aktiwiteite.

Die koshuis is meer as net ‘n woning waar lewenslange vriendskappe, drome en ervarings opgebou word. Die Rog en Sop is ‘n gebalanseerde koshuis wat jaarliks uitsonderlik presteer op kulturele-, leierskap-, sosiaal-maatskaplik-, akademiese- en sportgebied, om nie eens te praat van die sosiale en geestelike aktiwiteite nie. Ons is egter nie nét trots is op al ons koshuisleerders se prestasies nie, maar ook op die geluk, omgee, nederigheid en liefde wat elke dag in die gange en in elke huislid sigbaar is.

Laai gerus die Koshuisinligtingstuk en Inwonerdatavorm af indien jy ons koshuis jou tuiste gaan maak!

Inligtingstuk

Vorms

X