Personeel

André Franken

André Franken

Skoolhoof

Mnr. Franken begin sy onderwysloopbaan in 1982 te Hoërskool Volksrust in Mpumalanga waar hy na 3 jaar in 1985 bevorder word tot Departementshoof. Na tien baie gelukkige jare by Hoërskool Volksrust aanvaar mnr. Franken in 1993 ʼn Adjunkhoofpos by Hoërskool Bergvlam in Nelspruit. Hierdie pos beklee hy vir 5 jaar, waarna hy na die Bosveld verhuis, en in Januarie 1998 die skoolhoof word van Hoërskool Ben Viljoen in Groblersdal. Hy keer terug na Nelspruit in 2004 om die hoofskap te aanvaar van Hoërskool Bergvlam. Hy beklee die pos tot in 2012 waarna hy die Laeveld verlaat en verhuis na Kaapstad om in Januarie 2013 die hoof te word van Hoërskool Jan van Riebeeck. Hy verwerf sy BA Ed Graad in 1979 aan die Universiteit van Pretoria, voltooi in 1988 ʼn B.Ed (Honneurs) aan UNISA, in 1994 ʼn M.Ed (Magister) aan die Universiteit van die Oranje Vrystaat, en in 2002 ʼn Honneurs in Opvoedkundige Sielkunde aan UNISA.

Mnr. Franken is getroud met Estelle en hulle het drie kinders sowel as drie kleinkinders.

Lizette Visser

Lizette Visser

Adjunkhoof

Na voltooiing van haar naskoolse opleiding by haar alma mater, Universiteit Stellenbosch, het Lizette die voorreg gehad om by ʼn wye verskeidenheid skole as onderwyser en bestuurder te werk.  Dit sluit kleiner plattelandse skole, groot bekende hoërskole, skole in minder bevoorregte gemeenskappe sowel as 10 jaar by skole in Londen in.  Sy is steeds betrokke by Internasionale eksaminering (International Baccalaureate).  Sy floreer in ʼn diverse werks- en sosiale omgewing want sy glo daar is krag in verskeidenheid (diversiteit).  Ons leuse (Wees jouself) moedig juis dit aan.  Sy is ook ʼn ywerige reisiger/swerwer wat graag nuwe kulture en plekke ontdek.

Huibrecht Steyn

Huibrecht Steyn

Departementshoof, graad 8-voog en superintendent

Huibrecht verwerf in 1987 haar Baccalaureusgraad in Natuurwetenskappe  aan die Universiteit Stellenbosch. Sy voltooi ook ʼn Nagraadse Diploma in Hoër Onderwys en verwerf ook ʼn Diploma in gimnasiumbestuur.

 Sy is deel van die skool se bestuurspan en vakhoof van. Huibrecht is ook die Graad 8-leerders se graadvoog en betrokke by verskeie skoolaktiwiteite.

Astrid Mauermann

Astrid Mauermann

Departementshoof

Astrid het aan die Universiteit van Kaapstad gegradueer met ’n BA Hons.-graad en ’n Nagraadse Onderwyssertifikaat. Sy verwerf ook sertifikate in multikulturele onderrig, onderwysdidaktiek en opvoedkundige sielkunde aan die Magdeburg Universiteit in Duitsland, terwyl sy by ’n Duitse skool onderrig het. Astrid is ook Engels Vakhoof en Graad 10-voog by Jan van Riebeeck.

Lin Olivier

Lin Olivier

Graadvoog en vakhoof

Lin is gebore en getoë in Namibië en matrikuleer in Mariental. Na skool gaan studeer sy in Pretoria en voltooi ’n ND in Voedsel- en Kledingtegnologie en ’n ND in Hoër Onderwys, waarna sy begin klasgee by die Tswane Universiteit van Tegnologie.

Nadat sy getrou het en hul gesin uitgebrei het, werk sy as restaurantbestuurder van Postmasburg Hotel. Hierna bedryf sy vir vier jaar haar eie restaurant in Postmasburg. Sy span haar vlerke en werk vanaf 1996 by die Kruger Wildtuin voordat sy in 2000 die onderwys by ’n privaatskool betree.

Sy werk as betuurder van ’n Spar-franchise vanaf 2002-2004, en in begin sy skoolgee by Mafikeng Hoërskool in Huishoudkunde, Gasvryheidstudies en Tegnologie. Sy sluit haar in 2008 by die Jan van Riebeeck-personeel aan vir Gasvryheidstudies, Lewensoriëntering en Tegnologie. Sy gee Gasvryheidstudies en sy is sedert 2014 ’n graadvoog.

 

Liza Serrao

Liza Serrao

Graadvoog

Liza is ‘n Vrystater wat aan die Pukke studeer het. Sy bied tans Wiskunde aan vir graad 8 – 12. Sy was bevoorreg om al by verskeie skole te kon werk, voordat sy in April 2016 by Hoërskool Jan van Riebeeck aangesluit het. Liza is ‘n bedrewe en geïnspireerde Wiskunde-onderwyser en laat leerders gereeld aan Olimpiades deelneem om hul selfvertroue en entoesiasme te ontwikkel. As Wiskundige stel Liza ook dikwels haar kreatiewe kant in haar klas ten toon en leerders leer op unieke maniere, deur onder meer interessante raaisels op te los en selfs sang! Sy glo daarin om presteerders te beloon en dus maak sy gebruik van ‘n Hall of Fame in haar klaskamer. Sy is ons Wiskunde Vakhoof.

Ananda Visser

Ananda Visser

Graadvoog

Ananda voltooi in 1984 haar HOD Huishoudkunde aan die Universiteit van Kaapstad en op Januarie 1985 beklee sy haar eerste pos as onderwyseres by Hoërskool Buren, Ysterplaat. Sy was verbonde aan hierdie skool tot Junie 2003, waarna sy vir ongeveer twee jaar ʼn Kindertuinopvoeder by ʼn Engelse skool in Taiwan was. Sy was die koördineerder van die jaarlikse opvoering en het ook Engels onderrig vir studente by die Joy English School waar haar Internasionale “Teaching English as a Foreign Language”-sertifikaat, handig te pas gekom het.

Sy is sedert April 2005 verbonde aan Hoërskool Jan van Riebeeck. Sy het die eerste paar jaar Gasvryheidstudies onderrig, maar is tans die vakhoof van Toerisme. In 2017 behaal haar matriekklas die derde plek uit 50 skole vir die beste punte in Toerisme. Sy is ook die vakhoof.

Ruvan Prinsloo

Ruvan Prinsloo

Sportbestuurder en onderwyser

Ruvan het Menslike Bewegingskunde aan die Universiteit van Pretoria studeer en daarna ʼn NOS voltooi. In sy finale jaar ontmoet hy sy lewensmaat wie die Kaap wou kom verken. Hy hou nou gelukkig skool by Hoërskool Jan van Riebeeck en bied liggaamlike opvoeding, ʼn groot passie vir hom, aan. Hy rig sportspanne af en is ook die Sportbestuurder van die skool.

Sampie Griessel

Sampie Griessel

Vakhoof: Geografie

Na 25 jaar as senior Geografie-onderwyser en sporthoof van Hoërskool Vryburg, verruil Sampie die Noordwes Provinsie vir die Kaap. Hy matrikuleer in Ladybrand waarna hy aan die Universiteit van die Vrystaat studeer. Hy voltooi sy weermagopleiding in Grahamstad en is vir die afgelope 30 jaar ʼn onderwyser. Alhoewel hy nou ʼn Kapenaar is, bly hy steeds ʼn trotse Cheetah-ondersteuner.

Jean Matthee

Jean Matthee

Onderwyser: Engels

Na twee jaar as onderwyser in Japan, keer Jean terug na die Kaap waar hy as Engels-onderwyser by Hoërskool Jan van Riebeeck aansluit.
Jean se tersiêre opleiding begin by die Universiteit Stellenbosch en hy behaal ʼn Baccalaureusgraad in Skone Kunste en Engels Letterkunde. Na afloop van sy graad studeer hy ook ʼn Nagraadse Sertifikaat in Onderwys aan die Universiteit van Kaapstad.
Na twee jaar in die advertensiebedryf, het Jean sy lewe in die Kaap verruil vir die plattelandin Japan waar hy sy vaardighede verder ontwikkel het sowel as sy belangstelling in die onderwys gekoester het.

Rhonda Jansen van Vuuren

Rhonda Jansen van Vuuren

Vakhoof: Wiskundige Geletterdheid

Rhonda verwerf ’n BSc.graad met Honneurs in Botanie, asook ʼn Nagraadse Onderwysdiploma aan die Universiteit van Vrystaat. Sy verwerf ook ’n Gevorderde Onderwyssertifikaat in die spesialisveld van Wiskundige Geletterdheid aan die Universiteit Stellenbosch. Tydens haar nagraadse studies tree sy op as studentdemonstrateur en is sy verantwoordelik vir gedeeltes van die dekaan van Plantkunde se navorsing.
Sy betree die onderwys, en hou tot op hede daarmee vol. Sy is vakhoof van die Departement van Wiskundige Geletterdheid en gee Natuurwetenskap vir juniors by Hoërskool Jan van Riebeeck. Sy word aangestel en dien vir die afgelope drie jaar (by die Weskaapse Onderwysdepartement) as adjunkhoof-nasiener vir die Nasionale Sertifikaateksamen vir Wiskundige Geletterdheid.

Maritha Strydom

Maritha Strydom

Onderwyser: Afrikaans

Nadat sy aan Hoërskool Diamantveld in Kimberley haar matriek voltooi het, is sy na die UOVS in Bloemfontein waar sy die graad B.A. Algemeen met Tale, Sielkunde en Politieke Wetenskap voltooi het. Haar professionele loopbaan het in Lydenburg begin en later na Gauteng verskuif waar sy 35 jaar lank gewoon en skoolgehou het. Aan die begin van 2018 het sy na Kaapstad verhuis en beskou dit as ʼn besondere voorreg om in totaliteit nou deel van Hoërskool Jan van Riebeeck te kan wees.

Sanet Taljaard

Sanet Taljaard

Onderwyser: Afrikaans

Sanet se kaalvoetjare lê om ’n sandsteenhuis op ’n plaas naby Bethlehem in die Oos-Vrystaat. Konserte vir die skape en speel in die mielieblare berei haar voor vir ’n BA Drama Hons.-en- HOD-kwalifikasie van Kovsies.
By bevoorregte skole soos Oranje Meisieskool (Bloemfontein) en veral minderbevoorregte skole tussen die mynhope van Carletonville, leer sy dat onderwys nederigheid, geduld en hope luistervaardighede verg. Dat Drama ʼn handige instrument is om kinders te laat vlieg, ontdek sy dwarsdeur haar onderwysloopbaan. Hoog was die opwinding vir onderwyseres en kind by Hoërskool Grens (Oos Londen) toe hulle twee keer die geleentheid kry om op nasionale vlak deel te neem aan die ATKV-tienertoneelkompetisie te Aardklop.
Kreatiewe projekte word deel van haar lewe toe sy vyf jaar gelede Kaap toe trek. Terwyl sy deeltyds klasgee by CPUT (Wellington), bestuur sy ʼn Drama-skool saam met haar dogter, publiseer ʼn paar ondeunde flitsverhale in die Sarie-tydskrif, speel in ʼn paar Woordfees-produksies en proe wyn.
Tussen die lieflike berg en die see begin sy in 2018 haar passie vir Afrikaans en Drama uitleef by Hoërskool Jan van Riebeeck.

Huntie Meyer

Huntie Meyer

Onderwyser: Ingenieursgrafika en -Ontwerp

Hy matrikuleer aan Brandwag Hoërskool in Uitenhage , waarna hy twee jaar diensplig gaan doen. Na sy diensplig studeer hy BA Tech Ed. aan die Universiteit van Port Elizabeth. Hy voltooi sy HOD Diploma in Ingenieurstekeninge, H&M en Bybelkunde.
Huntie begin sy onderwysloopbaan by Hoërskool Kuruman, waarna hy ook skool gee by Cillie-Muir College. Hy verlaat egter die onderwys en werk vir 10 jaar as Besturende Direkteur van Granotech EC. Die besigheid sluit en hy begin gevolglik in 2011 by Hoërskool Jan van Riebeeck as onderwyser in Ingenieursgrafika en -Ontwerp.

Chrisna Griessel

Chrisna Griessel

Onderwyser: Geografie en Lewensoriëntering

Chrisna matrikuleer in 1984 en studeer onderwys in Bloemfontein. Sy begin haar loopbaan in die onderwys in 1989. Sy werk by Hoërskool MT Steyn, Hoërskool CR de Wet en Hoërskool Colinda. Sy en haar man Sampie verhuis na Kaapstad en in Januarie 2016 begin sy werk by Jan van Riebeeck. Sy is verantwoordelik vir Geografie vir graad 8-10 en Lewensoriëntering vir graad 9’s.

Jan Henning

Jan Henning

Onderwyser: Handelsvakke

Jan is gebore en getoë in die Noord-Oos Kaap. Na skool is hy na Bloemfontein waar hy ʼn diploma in rekenaardatabasisse aan die Damelin Kollege behaal het.
As 20-jarige het hy sy tassies gepak en ʼn Sabbatsjaar in Engeland geneem. Hierna is hy na die UOFS (in daardie jare nog) om B.Com (Algemene bestuur) te studeer.
Voor die voltooiing van sy graad het hy egter in ʼn onderneming saam met sy broer beland waar hy kitskos verkoop het. Hy kon gelukkig tog daarin slaag om sy graad te voltooi. Na twee jaar se harde arbeid in die kitskosbedryf is die onderneming verkoop en het sy loopbaan as onderwyser aan die Hoërskool Maclear in 2008 begin toe sy oud-skoolhoof hom gevra het om vir twee weke uit te help. In 2014 verhuis hy na die Kaap toe om sy loopbaan by Hoërskool Jan van Riebeeck af te skop.

Elize Gouws

Elize Gouws

Onderwyser: Besigheidstudies, LO en Skeppende Kunste: Drama

Elize is ‘n Ceresiet. Sy bied verskeie vakke aan naamlik Besigheidstudies, LO en Skeppende Kunste: Drama. Sy begin in Januarie 2016 by Hoërskool Jan van Riebeeck te werk.

Sonet Meyer

Sonet Meyer

Onderwyser: Handelsvakke

Sonet matrikuleer aan Hoërskool Nelspruit in die Laeveld. Sy voltooi haar B-Rek graad aan die Universiteit Stellenbosch waarna sy by EOH in Kaapstad in die finansiële afdeling werksaam is. Mettertyd het haar passie vir onderwys en afrigting ontwikkel en  gevolglik voltooi sy ook haar NOS. Sy bou ervaring op as onderwyser in die twee plattelandse dorpies van Ceres en Porterville en ook in Hong Kong in die buiteland. Sonet glo in inklusiwiteit in die klaskamer en om die leerder se potensiaal as mens te bevorder. Sy bied tans Rekeningkunde vir graad 10-12 asook EBW vir graad 9 aan. 

Albert Keet

Albert Keet

Onderwyser: Wiskundige Geletterdheid, NW en LW

Albert matrikuleer in 2009 aan die Hoërskool DF Malan, waarna hy sy Bsc- en NOS-grade aan die Universiteit van Stellenbosch voltooi. Hy het by ʼn chemiese maatskappy gewerk voor hy besluit het om gebruik te maak van sy NOS-kwalifikasie en het in 2015 by Hoërskool Jan van Riebeeck begin skoolgee. Die veld waarin hy spesialiseer is Lewenswetenskap (Biologie) en Natuurwetenskap. Hy het ʼn groot passie vir sport en is betrokke by rugby en atletiek. Hy het in 2017 sy Honneursgraad in Sielkunde deur UNISA voltooi en is tans besig met sy Meestersgraad in Opvoedkundige Sielkunde by die Universiteit van Stellenbosch.

Jeanne Potgieter

Jeanne Potgieter

Onderwyser: Engels Eerste Addisionele Taal

Jeanne is sedert 2002 aan Hoërskool Jan van Riebeeck verbonde as Engels EAT-onderwyseres, maar haar verbintenis met die skool strek veel verder. Haar Oupa, J.J. Jordaan, was die eerste skoolhoof van die skool en haar pa was ook later jare prinsipaal van Hoërskool Jan van Riebeeck.

Jeanne het tale (Afrikaans-Nederlands, Engels, Duits) aan die US studeer en ook twee-derdes van ‘n Honneurs in Sielkunde aan Unisa voltooi! Sy het een jaar as vertaler by die RGN in Pretoria oorleef, asook drie jaar as administratiewe beampte by die Administrasieraad in Port Elizabeth, waarna sy tot die gevolgtrekking gekom dat kantoorwerk nie vir haar is nie, en met groot vreugde na die onderwysberoep teruggekeer.

Ruthette Du Toit

Ruthette Du Toit

Onderwyser: Musiek

Ruthette is ’n oud-Jan van Riebeecker wat op skool al besonder lief was vir musiek en Latyn.
Na haar musiekstudies by die Universiteit van Stellenbosch, waar sy onder andere ’n onderwysdiploma en ’n honneursgraad in Musikologie behaal het (en in 4 kore gesing en in die US Simfoniese Blaasorkes gespeel het), het sy haar onderwysloopbaan by die Hoërskool J.J. du Preez begin. Daar het sy, benewens die klavier en hobo wat sy tydens haar studiejare bespeel het, ook onder druk die klarinet en fluit leer speel, omdat sy dit moes doseer. Toe die skool met ’n ander skool saamsmelt en Hoërskool Parow word, het sy voortgegaan en ook haar hand (en mond) aan saxofoon en fagot gewaag. Aldaar het sy die koor begelei en was sy in beheer van die houtblaasafdeling van die blaasorkes. Na byna 10 jaar daar het sy vir 6 jaar vryskutwerk gedoen, kwalifikasies in orrel en sang verwerf en in produksies opgetree. In 2006 keer sy terug na Jan van Riebeeck. Sy is ook kerkorrelis en ’n groot natuurliefhebber en voëlkyker.

Geruan Geldenhuys

Geruan Geldenhuys

Vakhoof: Musiek & Kultuurvoog

Geruan het in 2007 aan Helpmekaar Kollege, Johannesburg, matrikuleer waarna hy sy B.Mus en B.Mus Honeurs aan die Universiteit van die Vrystaat voltooi het. Hy tree en neem gereeld op saam met verskeie kunstenaars, simfonie-orkeste en by kunstefeeste oral in Suid-Afrika en was ook ‘n junior dosent aan die UV en die Vrystaat Musicon. Geruan sluit in 2019 by Hoërskool Jan van Riebeeck se musiekdepartement aan en is ook die dirigent van die skool se koor. Hy voltooi in 2019 sy Meestersgraad aan die Noordwes Universiteit, Potchefstroom, in uitvoerende musiek en navorsing wat fokus op die suksesvolle ontwikkeling van musiekleerders wat blootgestel word aan sorgsame ‘n omgewing en onderwysers.

Milandré Bezuidenhout

Milandré Bezuidenhout

Onderwyser: Natuurwetenskappe, Fisiese wetenskappe en Wiskunde

Danksy ʼn inspirerende Fisiese Wetenskappe onderwyseres in graad 10 ontwikkel Milandré ʼn passie vir Wetenskap. Die gevolg daarvan is ʼn BSc-graad aan die Universiteit van Stellenbosch. Na 3 jaar van harde werk, min slaap en baie koffie behaal sy haar graad in Polimeerwetenskappe. Sy het egter ʼn behoefte om haar passie en kennis met ander te deel en skryf dus in vir die Nagraadse Onderwys Sertifikaat wat sy in 2012 Cum Laude behaal. Op ʼn sonnige Maandagoggend in Januarie 2013 meld sy aan vir haar eerste dag as onderwyseres by die Hoërskool J.G. Meiring in die Noordelike Voorstede. Sy besluit egter om haar vlerke te sprei en begin in Januarie 2015 by Hoërskool Jan van Riebeeck werk.

Magda Vrey

Magda Vrey

Onderwyser: Kuns

Magda verwerf haar BA (Ed) kunsgraad aan die P.U vir CHO (PUKKE), trou met haar skoolkys en begin haar loopbaan in die onderwys by Hoërskool John Vorster aan die Oosrand. Na ongeveer 18 maande word sy gesekondeer na Glenvista High School. Na ʼn hele aantal jare, en die geboorte van haar oudste twee kinders, tree sy tydelik uit die onderwys om al haar aandag aan haar eie kinders se opvoeding te bestee. Sy keer terug na die onderwys en sluit aan by Hoërskool Alberton in ʼn tydelike hoedanigheid. Die gesin verhuis na die Wes-Kaap. ʼn Derde pienkvoet maak haar opwagting en Magda bied kunsklasse tuis, en by ʼn Private kunsskool in Durbanville, aan. Die gesin verhuis na die platteland waar Magda ʼn suksesvolle kunsskool in Wolseley en Ceres bedryf. Sy neem deel aan Kunsuitstallings by die plaaslike kunsgalery, en haar werke word ook in besighede in Ceres uitgestal. Die gesin verhuis na Table View en Magda sluit aan by die Blaauwberg Art Society. Sy neem deel aan talle kunsuitstallings onder andere die Olyffees by Riebeeck-kasteel, Koelenhof Winery, Paarl en Kirstenbosch. Haar jongste dogter, Anja, besluit om haar hoërskoolloopbaan aan die Hoërskool Jan van Riebeeck te volg, en so beland Magda hier, eers in ʼn aflospos en vanaf Julie 2012, as kunsonderwyseres.

Werner Cronjé

Werner Cronjé

Vakhoof: IT en RTT

Werner bied tans IT en Wiskunde by Hoërskool Jan van Riebeeck aan. Hy studeer aan die Universiteit van Stellenbosch en verwerf ʼn B.Sc. (met Ingenieursvakke, Rekenaarwetenskap en Fisika) in 1995. Aan die begin van 1996, na 4 maande as derde jaar ingenieurstudent, besluit hy om eerder te gaan werk. Hy kry dadelik werk as programmeerder by Strategic Software op Stellenbosch wat later SoftMAR raak. Hy werk vir 12 jaar by hierdie klein internasionale maatskappy en behaal in daardie tyd ‘n B. Hons in Rekenaarwetenskap (2003). In 2008 besluit hy om ʼn onderwyser te word en begin by Jan van Riebeeck in 2009 om IT en RTT te gee. Hy het ook sy NOS-graad in 2013 aan UNISA verwerf.

Nadine Petrick

Nadine Petrick

Bemarkings- en kommunikasiebestuurder

Nadine het vele jare sielsgeluk by die Universiteit van Pretoria gevind in die vorm van koffie en Backgammon, en het in dié tyd darem ook twee regsgrade en ’n honneurs in uitgewerswese behaal. Na deeltydse werk as lektor by ’n kollege in Pretoria en vryskutjoernalistiek vir verskeie publikasies het sy by Pieter Cilliers Produksies aangesluit as ’n navorser vir Kwêla op KykNET. Na amper ses lewensvormende jare by die produksiemaatskappy het sy egter besluit om die boereworsgordyn vir die druiwegordyn te verruil. In Stellenbosch werk sy by LitNet en SunMedia voordat sy as Kommunikasiebestuurder by Hoër Meisieskool Bloemhof aansluit. Na vyf jaar by dié skool, begin sy in Junie 2016 by Hoërskool Jan van Riebeeck in Kloofstraat werk.

Nicky Hattingh

Nicky Hattingh

Finansiële Bestuurder

Nicky is ʼn plattelandse Oos-Kapenaar wat verplant het na die Wes-Kaap omdat sy graag ʼn Matie wou wees. Buiten die vier jaar by Baker Tilly Greenwoods, waar sy haar “articles” voltooi het, het sy by ʼn paar interessante plekke gewerk wat onder meer die vervaardiging- en verkoop van “highlighting foils” insluit. Sy het die voorreg gehad om vir amper twee dekades verbonde te wees aan United Interiors, ʼn “shopfitting”-maatskappy en dink nou nog wanneer sy by ʼn groot klerewinkel instap: “We built this – we made it happen”. Sy beskou skool as ʼn heerlike nuwe uitdaging en sien uit om by te dra tot Hoërskool Jan van Riebeeck se suksesvolle toekoms.

Marina Pienaar

Marina Pienaar

Sekretaresse / Ontvangs

Marina was op skool in Parktown Commercial High in Johannesburg en het matrikuleer aan Gardens Commercial High. Sy het na skool by ’n prokureursfirma, Jan S. de Villiers en Seun, wat vandag as Werksmans bekend staan, as aktesekretaresse van die senior vennoot begin werk. Daarna bestuur sy vir 11 jaar Laerskool Parow-Noord se Finansiële Afdeling. Sedert September 2001 werk sy by Hoërskool Jan van Riebeeck as die skoolhoof se sekretaresse/ontvangs.

Brigitte Eygelaar

Brigitte Eygelaar

Registrateur

Brigitte het haar loopbaan in die restaurantbedryf begin en dit opgevolg met “Change Management” by ʼn brandstofmaatskappy waar sy kliënte wat nie rekenaargeletterd was nie opgelei het om hul bestellings aanlyn te plaas. Sy het selfs ʼn tydjie in die IT-afdeling gewerk. ʼn Kontrak van vyf weke het in ʼn kontrak van vyf jaar ontaard. Daarna werk sy vir ʼn veilingsmaatskappy waar sy eiendomme verkoop totdat die firma sluit. Brigitte begin haar reis by die Hoërskool Jan van Riebeeck in 2012 as registrateur. Sy verwerf ook in 2018 ʼn Baccalaureusgraad in Teologie en Bybelseberading.

Petula Titus

Petula Titus

Finansies

Petula Titus matrikuleer in 2007 by Fairmount Sekondêr Hoërskool. In 2018 bestuur sy deeltyds ʼn rekenaarkursus by Cedar Hoërskool. In Julie 2008 word sy permanent aangestel deur Lakato, ʼn farmaseutiese verspreidingpakhuis. Sy is ook besig om deeltyds aan Unisa te studeer en werk voltyds vir Hoërskool Jan Van Riebeeck in die Finansiële Afdeling.

Celesté Paterson

Celesté Paterson

Skoolsielkundige

Celéste Paterson het in Port Shepstone gematrikuleer waarna sy vir 2 jaar in Edinburgh, Skotland gewoon het. Na Skotland het sy ’n honneursgraad in opvoedkundige sielkundige aan die Universiteit van Johannesburg voltooi. In 2008 het sy en haar man besluit om Johannesburg vir Kaapstad te verruil. Sy werk vir 3 jaar by ’n klein skooltjie wat tuisonderrig doen in Monte Vista. Gedurende hierdie tyd voltooi sy haar meesters graad in opvoedkundige sielkundige aan die Universiteit in Stellenbosch, waarna sy haar internskap jaar by Herzlia Middle School voltooi. Sy word ook dan aangestel as Special Educational Needs Coordinator (SENCO) by Herzlia Middle School. In 2016 begin sy haar privaat praktyk in Nuweland en sy begin ook deeltyds by Jan van Riebeeck Hoërskool te werk as skoolsielkundige. Sy gaan voort om privaat werk drie dae ’n week te doen terwyl sy op ʼn Maandag en Donderdag by Jan Van Riebeeck Hoërskool is.

X
Copy link
Powered by Social Snap